NOS DÍAS ...

   Nos días pasados do mes de outubro demos comezo ás xornadas de catequese para nenos e mozos.

   En Fornelos imos ter catequese para nenos, coma nos anos pasados, os xoves pola tarde, ás catro, ao rematar o horario escolar.

   Tamén en Fornelos imos ter catequese para mozos, coma nos anos pasados, os venres pola tarde, ás catro e cuarto.

   En Moscoso imos ter catequese para nenos e mozos, coma nos anos pasados, os sábados ás catro e cuarto da tarde.

   En Verducido, este ano decidimos suspender a catequese, pola sinxela razón de que non hai, nin nenos nin mozos, que queiran participar.

   É certo que cada ano vai minguando o número de nenos e mozos, pois cada vez son menos nas parroquias. Pero tamén queremos dicir que, aínda que todos os pais firman unha carta de compromiso coa catequese dos nenos, non sempre se fai realidade este compromiso. É posible que os nenos vaian a catequese a outras parroquias, pero tamén é posible que aos pais non lles preocupe a catequese unha vez feita a primeira comuñón.

   Dende esta páxina queremos agradecerlle a María Emilia, a Elisa, a Geli, a María José e a Remedios que queiran dar unha man, nesta tarefa catequética. Grazas.

   Nos vindeiros días de novembro estamos tendo en todas as parroquias ocasión para rezar lembrando aos nosos parentes, amigos, veciños e benfeitores defuntos.

   Dende esta páxina queremos amosar o noso agradecemento a cantos homes e mulleres fixeron camiño de vida á nosa beira.

   É unha lembranza chea de saudades, pois son moitas as cousas que botamos de menos no compartir que fixemos con estes homes e mulleres.

   E coma cristiáns é unha lembranza confiada. Con Cristo temos a esperanza de que os irmáns e irmás defuntos morreron a esta vida, e nacen a unha VIDA RESUCITADA da man de cristo.

   A morte, para nós, non ten a última palabra, non pon fin a todo o que foi e é a vida.
A morte, para nós, é un paso, é unha porta que se abre máis alá da vida que hoxe estamos a compartir.

Estamos tan afeitos a crer so o que vemos ou palpamos que nos esquecemos que na vida hai experiencias que se nos escapan das mans. Estamos tan afeitos a controlalo todo que enchemos de medos aquilo que non palpamos, como pode ser a morte.

   Lembrar aos defuntos é moito máis que lembrar a súa morte. É ante todo lembrar a vida. O compartido encheu a nosa vida, por iso temos moito que agradecerlles, aínda que ao mesmo tempo o noso corazón se sinta doído pola ausencia.

ATRÁS